Turmush — Кечээ, 10-апрелде президент Садыр Жапаров Ош шаарындагы иш сапарында жашоочулар менен жолугушуп, көйгөйлөрүн укту.
Жолугушуу учурунда шаар тургуну Калима Токтосунова Бажы кызматында иштеген уулу УКМК тарабынан кармалганын билдирип, жардам берүүнү суранды. Анын айтымында, уулу 2025-жылдын 6-декабрында кармалган.
«Менин барбаган жерим калган жок, үйдө дагы 20га жакын кат бар, алардан бир дагы чечим чыккан жок. Азыр инсульт алганымдан сизге жакшы түшүндүрө аламбы, түшүндүрө албаймбы, аракет кылам. Балам менен сыналганда баарына даяр болот экенсиң. Жападан жалгыз балам, эч кимим жок. Ошол баламды 6 жыл бирөөлөр алдап кетип, кредитти төлөп, 30 жашында үйлөдүм. Али небере көрө элекмин.
2025-жылдын 6-декабрь күнү түнкү саат 03:00 чамасында УКМК кызматкерлери, опер группа кармап кетти. Бир жыл Чек ара кызматында иштеди, жакшы иштеген, эки окууну аяктаган, Кыргызстандын желегин желбиреткен спортчу бала. Бир дагы арам менен аралаштырбай, адал эмгек менен баккам. Контрабанда менен кармап, үч ай резонанс жаратышкан. Кийин Өзбекстандан сурасам, бир грамм алтын болгон эмес экен ал жерде. Болгону ал жерде 500-600 сомдук эле сахар диабетине дары болгон экен. Бардыгыбыздын алтындарыбызды чогултуп алып, бүт жаздырып алгам. Биринчиден, ал иш менин уулумдун иш убактысында болгон эмес экен. Эч кандай далил, видео байкоо болгон эмес. Аэропортто иштеген Бариддин деген таксист жаран болуптур. Ал менин уулумдан 15 миң сом акча алган экен. Кандай таанышы экенин билбейм. Унаасы бузулганда такси менен жүрүп, жанында алып жүргөн», - деди Калима Токтосунова.
Улуттук коопсуздук мамлекеттик комитетинин төрагасынын орун басары Алишер Эрбаев бул боюнча 7 жаран кармалганын билдирип, иш сотко өткөрүлүп берилгенин айтты.
«Бул факт боюнча 6-декабрда УКМК тарабынан жарандар кармалган. Ал жерде жалпы 7 жаран кармалып, аларга Кылмыш-жаза кодексинин беренелери менен контрабанда, аткезчилик боюнча айыптар коюлуп камалышкан. Бул аялдын уулу ошол маалда бажы тарабында кызматкер болуп иштеген. Тергөөнүн жүрүшүндө жана ыкчам аракеттердин негизинде күнөөсү далилденген. Алар аткезчилик учурунда алтын, зергер буюмдары жана медикамент, дары-дармектер менен алектенишкен. Транзиттик аралык кылмыштуу топтун курамында болгон. Бул жигит бардык төлөмдөрдү тиги жакка электрондук капчыктар менен алып турган. Булардын баары далилденип, учурда кылмыш иши прокуратура тарабынан сотко өткөрүлүп берилген», - деди ал.
Президент Садыр Жапаров бул ишке өзгөчө белги койгонун айтты.
«Эжеке, мен жазып алдым. Өзгөчө белги коюп койдум, мен баргандан кийин тактайм. Эгер чын эле контрабанда өткөрүп кармалган болсо, анда айла жок. Эгер сиз айткандай жөн эле акча түшүптүр деген сөздөр аныкталбаса, анда капа болбоңуз, бул биринчиси. Экинчиси, контрабанда боюнча. Бул эми отургандардын баарыбызга тиешелүү.
Биздин өлкөгө контрабанда деген товар кирбеши керек. Бул боюнча мен бардыгынан катуу талап кылып келе жатам. Мына экономикабыздын 3 эсеге өсүшү, айрым позициялар 9 эсеге өсүшү, айрыкча бажы тармагында ошол катуу көзөмөлдүн натыйжасы. Эгер андай кылбасак, контрабанда кире берсе, биз эч качан бюджетибизди толтура албайбыз, коррупцияны жок кыла албайбыз. Анда баягы эле 2020-жылга чейин эшек менен жүргөндөй жүрө беребиз. Капа болбоңуздар.
Дагы бир нерсе, жаштарыбыз наркотикке көп берилип кетип жатат. “Жөн эле курьердик кылдым эле, билбей калдым, бир жерден алып барып, экинчи жерге коюп койчу дегенинен алып барып койдум эле” деп синтетикалык наркотиктерге азгырылып кетип жаткандар бар. 400-500дөн ашуун жаш балдарыбыз түрмөдө жатат ушул боюнча. Мен өткөндө, жаңы жылдын алдында алардын ата-энелерин чогултуп, Ак үйдө түздөн-түз баарлаштым, Ынтымак-Ордодо. Биринчи жолу кармалгандарга сөз бердим, ырайым берип чыгарайын деп. Экинчи, үчүнчү жолу кармалгандар капа болбогула, алар бизнеске айлантып алган. Контрабанда менен наркотик бизде аябай чоң көйгөй болуп жатат. Казакстандан, Өзбекстандан кирет ар кандай нерселер. Тамак-аш болобу, башка болобу биз алардын баарын кармап жатабыз. Аёосуз кармап текшерип жатышат. Мына жакында эле Казакстандан чоң товар менен кирип келе жаткандарды да кармадык», - деди Садыр Жапаров
------------------------------------------------------------------
УКМК 2026-жылдын 19-декабрында Ош облусунда 15 өзбекстандык жана 10 кыргызстандыктан турган трансулуттук кылмыштуу топ аныкталып, ага колдоо көрсөткөн Мамлекеттик бажы кызматынын 2 кызматкери кармалганын билдирген.
Атайын кызматтын маалыматы боюнча, аталган кылмыштуу топ Түркиядан Кыргызстанга кымбат баалуу дары-дармектерди жана зер буюмдарды Ош облусунун аймагында сатуу, ошондой эле Өзбекстан Республикасына контрабандалык жол менен алып чыгуу үчүн системалуу түрдө алып кирип турган.
«Ош» бажысынын кызматкерлери Стамбул—Ош каттамы боюнча жүргүнчүлөрдүн багажын текшерүү учурунда Өзбекстандын жана Кыргызстандын айрым жарандарынан ири көлөмдөгү дары-дармектер менен зергер буюмдарды табышкан», - деп айтылган билдирүүдө.
Экономикалык контрабанда фактысы боюнча козголгон кылмыш ишинин алкагында жүргүзүлгөн ыкчам тергөө иш-чараларынын натыйжасында кылмыштуу топтун уюштуруучулары жана активдүү мүчөлөрү: Өзбекстан Республикасынын 3 жараны («У.Б.К.», «И.М.Т.» жана «С.У.А.») жана Кыргыз Республикасынын 5 жараны («И.З.М», «М.Б.П.», «М.У.К.», «К.Ш.Х.» жана «С.Б.К.») кармалып, УКМКнын тергөө абагына киргизилген.
«Аталган кылмыштуу топ 2025-жыл ичинде Түркиядан 50дөн ашык рейс жасап, 50 кг ашык алтынды контрабандалык жол менен алып кирген. Бул аракеттердин жыйындысы мамлекеттин бюджетине чоң зыян келтирген», - деп айтылган билдирүүдө.