Turmush — Талас шаарында эки унаанын катышуусунда жол кырсыгы орун алды. Бул тууралуу окуянын күбөлөрү билдиришти.
Маалыматка караганда, кырсык кечээ, 6-апрель күнү саат 16:00 чамасында калаанын Ч.Айтматов көчөсүндөгү “Алакчын” дүкөнүнүн алдында орун алган.
Анда “Форд Транзит” менен "Мерседес-Бенц Спринтер” үлгүсүндөгү унаалар кагышкан. Кырсыктын кесепетинен “Спринтер” унаасындагы жүргүнчүлөр жаракат алып, тез жардам кызматы аркылуу ооруканага жеткирилди. Каза болгондор болгон жок.
Талас облустук ооруканасынын маалыматына ылайык, кабыл алуу бөлүмүнө төмөнкү жарандар түшкөн:
— Т.А.Ч. аттуу аял — бетинин жумшак ткандары жабыркап, сол тарабында гематома аныкталган;
— Б.Г.Ж. аттуу аял — бетинин жана сол тизе муунунун жумшак ткандары жабыркаган;
— Э.Н.Б. аттуу аял — бетинин жумшак ткандары жабыркап, мурун сөөгү сынган.
Жабыркагандарга тиешелүү медициналык жардам көрсөтүлүүдө.