Turmush — Бүгүн, 10-апрелде президент Садыр Жапаров Ош шаарына болгон иш сапарынын алкагында 10 мектептин курулушуна расмий түрдө старт берди.
Өлкө башчысы иш-чарага келген мугалим менен баарлашып, эмгек акысы тууралуу сурады.
Садыр Жапаров: - Колуңузга канча алып жатасыз?
Мугалим: - 34 миң.
Садыр Жапаров: - 34 миң алып келдиңиз ээ? Эми апрелден баштап канча аласыз?
Мугалим: - Буюрса 100 пайыз кошулат.
Садыр Жапаров: - 68 миң. 34 миң турмушка, бала-чакага жетчү беле?
Мугалим: - Жок.
Садыр Жапаров: - Эми азыр 68 миң жетеби?
Мугалим: - Жетет.
Садыр Жапаров: - Жетсе болду.
Мугалим: Жакшы шартта балдарыбызга билим берүү биз үчүн сыймык, сизге рахмат.
Садыр Жапаров: - азыркы учурда сизде бир класста канча бала окуйт?
Мугалим: - 40 бала.
Садыр Жапаров: - Бул мектеп бүтсө, 20га болбосо да 30га түшөт экен. Эмдиги жылдары 20га түшүрөбүз. 30 жылдан бери салып келе берсе, бүгүнкү күндө бир кабинетте 40-50дөн бала окубайт эле. Биз күчүбүздүн жетишсинче, акчабыздын болушунча 5 жылдан бери жылда салып келе жатабыз. Көрүп жатасыздар. 2030-жылга чейин жоюуп бүтөбүз.
------------------------------------------------------------
Элдик курултайдын жүрүшүндө президент Садыр Жапаров 2026-жылдын 1-апрелинен баштап мугалимдердин айлыгы 100% көбөйө турганын билдирген.
«Жакында эле Министрлер кабинетинин башчысы айлык акылар 50%дан кем эмес көтөрүлөрүн билдирген. Кечээ менин кабинетимде жыйын болуп, президенттин кошумча 15 миң сом компенсациясын киргизүү менен айлык акыны орто эсеп менен 100% көтөрсөк болот деп чечтик», - деген президент.
Анын айтымында, бүгүнкү күндө мугалимдердин айлыгы орто эсеп менен 26 миң сом болсо, апрель айында көтөрүлгөндөн кийин орточо эсеп менен 52 миң сомду түзөт. Мугалимдердин эмгек акысы алардын билим деңгээлине, педагогикалык тажрыйбасына, квалификациялык категориясына, окутуу аймагына, предметине жана жумалык жүктөмүнө жараша болот.
Шаардагы орто педагогикалык билими бар, бирок мугалимдик стажы жок жаңы мугалимге апредлен баштап 36 миң 800 сом, ал эми колго 31 миң 200 сом алат. Бул окуу жайды жаңы бүткөн жаңы мугалим.
Аймактык коэффициенти 1,8 болгон бийик тоолуу аймакта иштеп, жашаган, 30 жылдан ашык стажы бар математика мугалими учурда 65 миң 800 сом алса, 2026-жылдын апрелинен тарта маянасы 97 миң 600 сомго чейин көтөрүлөт.